മിഷന്‍ 90 ഡേയ്സ്‌
ലോക മനസാക്ഷിയെ ഒന്നടങ്കം ഞെട്ടിച്ച രാജീവ്‌ ഗാന്ധി വധക്കേസിന്റെ പശ്ചാത്തലത്തില്‍ മേജര്‍ രവി തിരക്കഥയെഴുതി സംവിധാനംചെയ്യുന്ന മിഷന്‍ 90 ഡെയ്സ്‌ എന്ന ചിത്രത്തിന്റെ ചിത്രീകരണം കൊച്ചിയില്‍ ആരംഭിച്ചു. കീര്‍ത്തിചക്രയുടെ വന്‍ വിജയത്തിനുശേഷം മേജര്‍ രവി ഒരുക്കുന്ന മിഷന്‍ 90 ഡെയ്സില്‍ മമ്മൂട്ടിയാണ്‌ കേന്ദ്ര കഥാപാത്രത്തെ അവതരിപ്പിക്കുന്നത്‌.
ശ്രീ ഉത്തൃട്ടാതി ഫിലിംസ്‌ പ്രൈവറ്റ്‌ ലിമിറ്റഡിന്റെ ബാനറില്‍ ശശി അയ്യന്‍ചിറ നിര്‍മിക്കുന്ന ഈ ചിത്രത്തില്‍ ലാലു അലക്സ്‌, കൊച്ചിന്‍ ഹനീഫ, കലാഭവന്‍ മണി, ഇന്നസെന്റ്‌, ബാബുരാജ്‌, അബു സലിം, കിരണ്‍ രാജ്‌, രവി മറിയ, ഋഷിരാജ്‌ സിംഗ്‌, സഞ്ജന സിന്‍ഹ, ഫരീദാ, ദേവി, ട്രസ്റ്റീന തുടങ്ങിയവര്‍ പ്രധാന കഥാപാത്രങ്ങളെ അവതരിപ്പിക്കുന്നു.
മുന്‍ പ്രധാനമന്ത്രി രാജീവ്‌ ഗാന്ധിയുടെ അതിദാരുണമായ വധത്തെത്തുടര്‍ന്ന്‌ രാഷ്ട്രീയ പ്രമുഖരും ഭരണകര്‍ത്താക്കളും ഉയര്‍ന്ന ഉദ്യോഗസ്ഥരും ഒറ്റക്കെട്ടായി ശക്തിയായി ആവശ്യപ്പെട്ട കാര്യമായിരുന്നു ഇതിന്റെ കേസന്വേഷണം സ്പെഷല്‍ ടീമിനെക്കൊണ്ടായിരിക്കണമെന്ന്‌. കാരണം ശക്തിയും ബുദ്ധിയും അതിനുപരി ആയുധങ്ങളുമുള്ള തീവ്രവാദികളെ നേരിടാന്‍ അതിനെ പ്രതിരോധിക്കാന്‍ കഴിയുന്നവര്‍തന്നെയായിരിക്കണെന്ന അടിസ്ഥാനത്തിലാണ്‌ രാജീവ്‌ ഗാന്ധി വധക്കേസിലെ പ്രതികളെ കണെ്ടത്താന്‍ നാഷണല്‍ സെക്യൂരിറ്റി ഗാര്‍ഡിനെ നിയോഗിച്ചത്‌.ഡിഐജി രാജുവിന്റെ കീഴില്‍ പ്രവര്‍ത്തിക്കുന്ന ഒരു സംഘം മിടുക്കരായ നാഷണല്‍ സെക്യൂരിറ്റി ഗാര്‍ഡിലെ ധീരനായ പട്ടാളക്കാരനാണ്‌ മേജര്‍ ശിവ്‌റാം. ഇവര്‍ ഒരുക്കുന്ന തന്ത്രപരമായ നീക്കങ്ങളിലൂടെ ശക്തിയും ബുദ്ധിയും പ്രയോഗിച്ച്‌ 90 ദിവസംകൊണ്ട്‌ തങ്ങളുടെ ദൗത്യം പൂര്‍ണമാക്കുമ്പോള്‍ അനുഭവിക്കേണ്ടിവരുന്ന സാഹസികതയാര്‍ന്ന നിമിഷങ്ങളും മാനസിക സംഘര്‍ഷങ്ങളുമാണ്‌ മിഷന്‍ 90 ഡെയ്സില്‍ ചിത്രീകരിക്കുന്നത്‌. പ്രതിയായ ശിവരസനെ പിടികൂടുന്നതിനുമുമ്പ്‌ ഒട്ടേറെ കുറ്റവാളികളുടെ പരമ്പരയെത്തന്നെ മറികടന്നാണ്‌ തങ്ങള്‍ക്ക്‌ ലക്ഷ്യസ്ഥാനത്ത്‌ എത്താന്‍ കഴിഞ്ഞത്‌. അതിന്‌ ഏറ്റവും സഹായകമായത്‌ ഡിഐജിയുടെ ബുദ്ധിയും മേജര്‍ ശിവ്‌റാമിന്റെ ശക്തിയുമായിരുന്നു. ഒരു മേലുദ്യോഗസ്ഥന്‍ എന്നതിനുപരി പലപ്പോഴും മേജര്‍ ശിവ്‌രാമിനെ രാജു ശ്രദ്ധിച്ചിരുന്നു. അത്രയ്ക്ക്‌ മാനസികബന്ധം രാജുവും ശിവ്‌റാമും തമ്മിലുണ്ടായിരുന്നു. രണ്ട്‌ ഉയര്‍ന്ന ഉദ്യോഗസ്ഥരുടെ സൗഹൃദത്തിന്റെ ശക്തിയും അതുമൂലം നേടാന്‍കഴിഞ്ഞ ലക്ഷ്യപ്രാപ്തിയുമാണ്‌ ഈ ചിത്രത്തിലൂടെ മേജര്‍ രവി ചിത്രീകരിക്കുന്നത്‌.
മേജര്‍ ശിവ്‌റാമിനെ മമ്മൂട്ടി അവതരിപ്പിക്കുമ്പോള്‍ ഡിഐജി രാജുവായി ലാലു അലക്സ്‌ അഭിനയിക്കുന്നു. വളരെ സാഹസികവും കാര്യക്ഷമവുമായ പരിശ്രമത്തിലൂടെ രാജീവ്‌ ഗാന്ധി വധക്കേസിലെ പ്രതിയായ ശിവരശനെ പിടികൂടിയെങ്കിലും സാധാരണ ജനങ്ങള്‍ക്ക്‌ അറിയാന്‍ കഴിയാത്ത കാര്യങ്ങള്‍ ഈ സിനിമയിലൂടെ പ്രേക്ഷകരെ ബോധ്യപ്പെടുത്താന്‍ ശ്രമിക്കുകയാണ്‌ സംവിധായകന്‍ മേജര്‍ രവി.വയലാര്‍ ശരത്ചന്ദ്രവര്‍മ എഴുതി, ആനച്ചന്തത്തിലൂടെ ശ്രദ്ധേയനായ ജെക്സണ്‍ ജെ. നായര്‍ സംഗീതസംവിധാനം നിര്‍വഹിച്ച ഗാനമാണ്‌ ഈ ചിത്രത്തില്‍ ഉള്ളത്‌. കീര്‍ത്തിചക്രയുടെ ഛായാഗ്രാഹകന്‍ തിരുതന്നെയാണ്‌ മിഷന്‍ 90 ഡെയ്സിന്റെ കാമറ കൈകാര്യം ചെയ്യുന്നത്‌.സംഭാഷണം- ഷിജു നമ്പ്യത്ത്‌, മേക്കപ്പ്‌- സുദേവന്‍ സ്റ്റില്‍സ്‌- രാമലിംഗം, പരസ്യകല- രമേശ്‌ എം. ചാനല്‍, എഡിറ്റര്‍- ജയശങ്കര്‍, ഓഫീസ്‌ നിര്‍വഹണം- കെ.ആര്‍. മണി, പ്രൊഡക്ഷന്‍ മാനേജര്‍- രാജേഷ്‌, പ്രൊഡക്ഷന്‍ എക്സിക്യൂട്ടീവ്‌- ബാദുഷ, ആന്റണി ഇരിങ്ങാലക്കുട, പ്രൊഡക്ഷന്‍ കണ്‍ട്രോളര്‍- കണ്ണന്‍ പട്ടാമ്പി. കൊച്ചി, മദ്രാസ്‌, ബാംഗളൂര്‍ എന്നിവിടങ്ങളിലായി ചിത്രീകരണം പൂര്‍ത്തിയാകുന്നു.
No comments:
Post a Comment